ოქროს ბარძიმი, რომელიც ტაძარს დედამ და შვილმა შესწირეს

999 წელს მეფე ბაგრატ III-მ და მისმა დედამ, დედოფალმა გურანდუხტმა, ბედიის ღვთისმშობლის ტაძარს ოქროს ბარძიმი შესწირეს.

ბარძიმზე დეკორატიული თაღების ქვეშ თორმეტი ფიგურაა გამოსახული. ათას წელზე მეტი ხნის შემდეგაც იკითხება ასომთავრული წარწერა, რომელშიც ღვთისმშობელს სთხოვენ, ძის წინაშე მეოხ ეყოს ბაგრატს, აფხაზთა მეფეს, და მის დედას, დედოფალ გურანდუხტს-ამ ბარძიმის შემწირველებს, საკურთხევლის შემამკობლებს და ტაძრის აღმშენებლებს.

ბედიის ბარძიმი, ქართული ოქრომჭედლობის ერთ-ერთი თვალსაჩინო ნიმუში, დაცულია შალვა ამირანაშვილის სახელობის ხელოვნების მუზეუმის კოლექციაში.

ფოტოებზე:

1. ბედიის ბარძიმი, 999 წ. ოქრო

2–3. ბედიის ბარძიმი, 999 წ. ფრაგმენტები

„აფხაზეთი“ (2021) · საქართველოს ეროვნული მუზეუმი · გამოიცა საზოგადოება ივერიისას მხარდაჭერით.